የኢፌዴሪ የህዝብ ተወካዮች ም/ቤት የሰው ሃብት ልማት፣ ስራ ስምሪት እና ቴክኖሎጂ ጉዳዮች ቋሚ ኮሚቴ በወልቂጤ ዩኒቨርሲቲ በመገኘት የመስክ ምልከታ አካሂደዋል፡፡
የምልከታው ዓላማ የ2015 ዓ.ም የመማር ማስተማር ስራው በተያዘለት ፕሮግራም መሰረት ስለመጀመሩ፣ የጥናትና ምርምር ስራዎችን በተገቢው በማከናወን ለማህበረሰብ ተደራሽ ስለመደረጋቸው፣ የዩኒቨርሲቲ-ኢንዱስትሪ ትስስርና የባለድርሻ አካላት ተሳትፎን በተመለከተ፣ የባለብዙ ዘርፍ ስራዎችን (Cross-cutting) በተመለከተ፣ አዳዲስና የማስፋፊያ ግንባታዎችን በተመለከተ፣ የበጀት አጠቃቀምና የመንግስት ንብረት አያያዝን በተመለከተ፣ የክትትልና ቁጥጥር አግባብን በተመለከተ፣ በዩኒቨርሲቲው በጥንካሬ ፣በእጥረት የታዩና ከዩኒቨርሲቲው አቅም በላይ የሆኑ ጉዳዮችን በተመለከተ፣ የአገልግሎት አሰጣጥና የመልካም አስተዳደር ችግሮች ያሉበት ደረጃ እና የትምህርት ጥራትን ለማስጠበቅ ያለውን ቁርጠኝነት በተጨባጭ በመስክ ምልከታ ለማረጋገጥ ምልከታው ተካሂዷል፡፡
በዚህም መሰረት የቋሚ ኮሚቴው አባላት በቅድሚያ የዩኒቨርሲቲውን አጠቃላይ አፈጻጸም አስመልክቶ በዩኒቨርሲቲው ፕሬዝዳንት በዶክተር ፋሪስ ደሊል አማካይነት የቀረበላቸውን ሪፖርት ያዳመጡ ሲሆን ቋሚ ኮሚቴው ሪፖርቱን ካደመጠ በኋላ ከተለያዩ የስራ ክፍሎች ከተውጣጡ መምህራንና ድጋፍ ሰጪ ሰራተኞች ጋር እንዲሁም ከተለያዩ ኮሌጆች ከተውጣጡ የተማሪ ተወካዮች ጋር በተለያዩ ርዕሰ ጉዳዮች ዙሪያ ውይይት አድርገዋል፡፡
ቋሚ ኮሚቴው ከሰዓት በኋላ በነበረው ቆይታ የተለያዩ የተግባር ትምህርት መስጫ ላቦራቶሪዎችንና ወርኮሾፖችን፣ ቤተመጻህፍት፣የተማሪዎች ምግብ ቤት ፣የተማሪዎች ማደሪያ እና የተማሪዎች ክሊኒክ የጎበኙ ሲሆን በነገው ዕለት የምርምር ጣቢያዎች፣የተለያዩ ፕሮጀክቶችን( የአስተዳደር ህንጻ፣የህጻናት ማቆያ ፣የመማሪያ ክፍሎች ፣የተማሪዎች ማደሪያ፣ የአይሲቲ ህንጻ እና ማዕከላዊ ቤተሙከራ ) እንደሚጎበኙ ለማወቅ ተችሏል፡፡
“ለጥበብ እንተጋለን! “
“We Strive for Wisdom! “
የወልቂጤ ዩኒቨርሲቲ የህዝብና ዓለም አቀፍ ግንኙነት ዳይሬክቶሬት
